Play Reading نصوص لم تقرأ بعد

---

 Extract

زيارات سلمى

  طلعنا بسيارتي الزغيرة، بنهار تشريني كانت السما عم تنّقط لأوّل مرّة سنتها، وقررنا نروح صوب الكورنيش.

  من عوايد الكورنيش نوّقف عالدكانة ونشتري قهوة. بلحظة لوقفنا عطينا بعض فيلم د ف د الملّخص اللي عليه بالفرنساوي.

  بنسأل عن معنى كلمة. بفّسر الكلمة بحماس بلا ما أعرف نهارتها وين الحديث رح يوصل وكيف هالكلمة رح يصير قلا معنى اكبر.

  الصدف - الحماس - الشغف - الحلم - المخيّلة - التوّقعات - الأفق - الإرتباط - المشاعر الكبيرة - مشاريع سفر

  افكار تبلورت واتفكّر فيا كتير بس البعض منها صارت بتخوّف، فبطلّت تُستعمل. بطلّت تصاغ بالجمل. صارت يتفكر فيا عالسكت او اكتر شي تنكتب على الدفتر بالسرّ.

  ترجمة او تفسير الكلمة بالفرنسي كانت الإنهيار. هيي لاستُعملت لتوصف حدث مهمّ بالفيلم.

  بس انا ما فيي استعملها لأوصف ايّ حدث بهيدا النهار ام غيره.

  بهالقصة الأنهيار ما كان حدث. كان حالات متكررة. حالات نفسية بترد الاشيا عذات النقطة.

  رجعت عالبيت نهارتا حامل كلمات متل الخيبة - الضياع… وّعو فيي ضعف معيّن ما عبّرت عنّو بس ضلّ جوّاتي.

  ومن بعدها فلّيت سلمى.

  قطع اشهر على زيارة سلمى. ووصل نهار بيعتبروا عيد الحبّ. كنت عم رتّب وعرّب صوري. شغلة كتير عم بعملها ماّخّراً.

  نوع من مواجهة مع الماضي. نوع من تسأول عن الوقت لقطع. انا وغاطس بيطلعلي صور آخدها من وحدة لزيارتي لموسكو. صور شباب بالمترو حاملين باقات زهور منها ملفوفة بورق كرافت.

  فبجمّع الصور وبقرر شاركن مع الناس.

  مشاركة الصور مع الناس. التفاعل مع الصور. رجعتي عالماضي. كميّة تساؤلات. التساؤلات لبتوّدي لفعل. الفعل اللي ودّا نهارتها لاتصال عفوي. وّدى لذات النتيجة. ويمكن هالمرّة الكلمة الفرنسية لكانت بتوصف حالة النفسية من كم شهر، يومتا صارت حدث. ما كان فيو بُعد بس خلص الحكي من بعد.

  ومن بعدها فلّيت سلمى مرّة جديدة.

  الصمت تقيل. ما فيك تتحكم فيه لو حتّى علّيت اكتر موسيقى صاخبة.

  بتتأقلم مع الواقع. الشعور اللي ما عبرّت عنو بالأوّل بتخبّي بعد اكتر.

  بتغمض عيونك وقتى تشوف صورة، وبتسكّر دينيك لما تسمع غنية. واذا كلّ شي حواليك بيجبرك تتذكر، بتبعت رسالة بريدية عارف انو كتير معقول ما توصل.

  سلمى ما الها علاقة مباشرةً بهالقصة.

  سلمى وصلت لهون الاسبوع الماضي لتالة مرّة من تشرين.

  بس زياراتها لهون بساقبو دايمن باوقات مفصلية.

  سلمى انا وعم بقرا هالنّص يحي بالطيّارة. كانت هون. وفلّيت اليوم. راجعة عفرنسا.

  صار لقاء بينتانا -مش عم بحكي عن سلمى- بس هالقاء كان صدفة. ما بعرف اذا مركّب ام لا.

  بس اللي بعرفو، انو هالمرّة زيارتها يمكن كانت الاخيرة. الاخيرة بترم هالقصة.

  زيارات سلمى التلاتة كانو سريعين.

  الخيبة. رغم كلّ الحكي اللي ما نقال. ولو كنت عارف رح تخلص هيك كنت قلتو. رغم كلّ الحبّ اللي ما تشارك. ولو كنت عارف رح تخلص هيك كنت عبّرت عنه. رغم المواجهة لما صارت.

  بين زيارة وزيارة لسلمى القصّة كانت حلوة وهلأ خلصت.